श्री हनुमान बाहुक हिंदी और अंग्रेजी में | Shri Hanuman Bahuk in Hindi and English
छप्पय सिंधु तरन, सिय-सोच हरन, रबि बाल बरन तनु । भुज बिसाल, मूरति कराल कालहु को काल जनु ॥ गहन-दहन-निरदहन लंक निःसंक, बंक-भुव । जातुधान-बलवान मान-मद-दवन पवनसुव ॥ कह तुलसिदास सेवत सुलभ सेवक हित सन्तत निकट । गुन गनत, नमत, सुमिरत जपत समन सकल-संकट-विकट ॥१॥
स्वर्न-सैल-संकास कोटि-रवि तरुन तेज घन । उर विसाल भुज दण्ड चण्ड नख-वज्रतन ॥ पिंग नयन, भृकुटी कराल रसना दसनानन । कपिस केस करकस लंगूर, खल-दल-बल-भानन ॥ कह तुलसिदास बस जासु उर मारुतसुत मूरति विकट । संताप पाप तेहि पुरुष पहि सपनेहुँ नहिं आवत निकट ॥२॥
झूलना पञ्चमुख-छःमुख भृगु मुख्य भट असुर सुर, सर्व सरि समर समरत्थ सूरो । बांकुरो बीर बिरुदैत बिरुदावली, बेद बंदी बदत पैजपूरो ॥ जासु गुनगाथ रघुनाथ कह जासुबल, बिपुल जल भरित जग जलधि झूरो । दुवन दल दमन को कौन तुलसीस है, पवन को पूत रजपूत रुरो ॥३॥
घनाक्षरी भानुसों पढ़न हनुमान गए भानुमन, अनुमानि सिसु केलि कियो फेर फारसो । पाछिले पगनि गम गगन मगन मन, क्रम को न भ्रम कपि बालक बिहार सो ॥ कौतुक बिलोकि लोकपाल हरिहर विधि, लोचननि चकाचौंधी चित्तनि खबार सो। बल कैंधो बीर रस धीरज कै, साहस कै, तुलसी सरीर धरे सबनि सार सो ॥४॥
भारत में पारथ के रथ केथू कपिराज, गाज्यो सुनि कुरुराज दल हल बल भो । कह्यो द्रोन भीषम समीर सुत महाबीर, बीर-रस-बारि-निधि जाको बल जल भो ॥ बानर सुभाय बाल केलि भूमि भानु लागि, फलँग फलाँग हूतें घाटि नभ तल भो । नाई-नाई-माथ जोरि-जोरि हाथ जोधा जो हैं, हनुमान देखे जगजीवन को फल भो ॥५॥
गो-पद पयोधि करि, होलिका ज्यों लाई लंक, निपट निःसंक पर पुर गल बल भो । द्रोन सो पहार लियो ख्याल ही उखारि कर, कंदुक ज्यों कपि खेल बेल कैसो फल भो ॥ संकट समाज असमंजस भो राम राज, काज जुग पूगनि को करतल पल भो । साहसी समत्थ तुलसी को नाई जा की बाँह, लोक पाल पालन को फिर थिर थल भो ॥६॥
कमठ की पीठि जाके गोडनि की गाड़ैं मानो, नाप के भाजन भरि जल निधि जल भो । जातुधान दावन परावन को दुर्ग भयो, महा मीन बास तिमि तोमनि को थल भो ॥ कुम्भकरन रावन पयोद नाद ईधन को, तुलसी प्रताप जाको प्रबल अनल भो । भीषम कहत मेरे अनुमान हनुमान, सारिखो त्रिकाल न त्रिलोक महाबल भो ॥७॥
दूत राम राय को सपूत पूत पौनको तू, अंजनी को नन्दन प्रताप भूरि भानु सो । सीय-सोच-समन, दुरित दोष दमन, सरन आये अवन लखन प्रिय प्राण सो ॥ दसमुख दुसह दरिद्र दरिबे को भयो, प्रकट तिलोक ओक तुलसी निधान सो । ज्ञान गुनवान बलवान सेवा सावधान, साहेब सुजान उर आनु हनुमान सो ॥८॥
दवन दुवन दल भुवन बिदित बल, बेद जस गावत बिबुध बंदी छोर को । पाप ताप तिमिर तुहिन निघटन पटु, सेवक सरोरुह सुखद भानु भोर को ॥ लोक परलोक तें बिसोक सपने न सोक, तुलसी के हिये है भरोसो एक ओर को । राम को दुलारो दास बामदेव को निवास। नाम कलि कामतरु केसरी किसोर को ॥९॥
महाबल सीम महा भीम महाबान इत, महाबीर बिदित बरायो रघुबीर को । कुलिस कठोर तनु जोर परै रोर रन, करुना कलित मन धारमिक धीर को ॥ दुर्जन को कालसो कराल पाल सज्जन को, सुमिरे हरन हार तुलसी की पीर को । सीय-सुख-दायक दुलारो रघुनायक को, सेवक सहायक है साहसी समीर को ॥१०॥
रचिबे को बिधि जैसे, पालिबे को हरि हर, मीच मारिबे को, ज्याईबे को सुधापान भो । धरिबे को धरनि, तरनि तम दलिबे को, सोखिबे कृसानु पोषिबे को हिम भानु भो ॥ खल दुःख दोषिबे को, जन परितोषिबे को, माँगिबो मलीनता को मोदक दुदान भो । आरत की आरति निवारिबे को तिहुँ पुर, तुलसी को साहेब हठीलो हनुमान भो ॥११॥
सेवक स्योकाई जानि जानकीस मानै कानि, सानुकूल सूलपानि नवै नाथ नाँक को । देवी देव दानव दयावने ह्वै जोरैं हाथ, बापुरे बराक कहा और राजा राँक को ॥ जागत सोवत बैठे बागत बिनोद मोद, ताके जो अनर्थ सो समर्थ एक आँक को । सब दिन रुरो परै पूरो जहाँ तहाँ ताहि, जाके है भरोसो हिये हनुमान हाँक को ॥१२॥
सानुग सगौरि सानुकूल सूलपानि ताहि, लोकपाल सकल लखन राम जानकी । लोक परलोक को बिसोक सो तिलोक ताहि, तुलसी तमाइ कहा काहू बीर आनकी ॥ केसरी किसोर बन्दीछोर के नेवाजे सब, कीरति बिमल कपि करुनानिधान की । बालक ज्यों पालि हैं कृपालु मुनि सिद्धता को, जाके हिये हुलसति हाँक हनुमान की ॥१३॥
करुनानिधान बलबुद्धि के निधान हौ, महिमा निधान गुनज्ञान के निधान हौ । बाम देव रुप भूप राम के सनेही, नाम, लेत देत अर्थ धर्म काम निरबान हौ ॥ आपने प्रभाव सीताराम के सुभाव सील, लोक बेद बिधि के बिदूष हनुमान हौ । मन की बचन की करम की तिहूँ प्रकार, तुलसी तिहारो तुम साहेब सुजान हौ ॥१४॥
मन को अगम तन सुगम किये कपीस, काज महाराज के समाज साज साजे हैं । देवबंदी छोर रनरोर केसरी किसोर, जुग जुग जग तेरे बिरद बिराजे हैं । बीर बरजोर घटि जोर तुलसी की ओर, सुनि सकुचाने साधु खल गन गाजे हैं । बिगरी सँवार अंजनी कुमार कीजे मोहिं, जैसे होत आये हनुमान के निवाजे हैं ॥१५॥
सवैया जान सिरोमनि हो हनुमान सदा जन के मन बास तिहारो । ढ़ारो बिगारो मैं काको कहा केहि कारन खीझत हौं तो तिहारो ॥ साहेब सेवक नाते तो हातो कियो सो तहां तुलसी को न चारो । दोष सुनाये तैं आगेहुँ को होशियार ह्वैं हों मन तो हिय हारो ॥१६॥
तेरे थपै उथपै न महेस, थपै थिर को कपि जे उर घाले । तेरे निबाजे गरीब निबाज बिराजत बैरिन के उर साले ॥ संकट सोच सबै तुलसी लिये नाम फटै मकरी के से जाले । बूढ भये बलि मेरिहिं बार, कि हारि परे बहुतै नत पाले ॥१७॥
सिंधु तरे बड़े बीर दले खल, जारे हैं लंक से बंक मवासे । तैं रनि केहरि केहरि के बिदले अरि कुंजर छैल छवासे ॥ तोसो समत्थ सुसाहेब सेई सहै तुलसी दुख दोष दवा से । बानरबाज ! बढ़े खल खेचर, लीजत क्यों न लपेटि लवासे ॥१८॥
अच्छ विमर्दन कानन भानि दसानन आनन भा न निहारो । बारिदनाद अकंपन कुंभकरन से कुञ्जर केहरि वारो ॥ राम प्रताप हुतासन, कच्छ, विपच्छ, समीर समीर दुलारो । पाप ते साप ते ताप तिहूँ तें सदा तुलसी कह सो रखवारो ॥१९॥
घनाक्षरी जानत जहान हनुमान को निवाज्यो जन, मन अनुमानि बलि बोल न बिसारिये । सेवा जोग तुलसी कबहुँ कहा चूक परी, साहेब सुभाव कपि साहिबी संभारिये ॥ अपराधी जानि कीजै सासति सहस भान्ति, मोदक मरै जो ताहि माहुर न मारिये । साहसी समीर के दुलारे रघुबीर जू के, बाँह पीर महाबीर बेगि ही निवारिये ॥२०॥
बालक बिलोकि, बलि बारें तें आपनो कियो, दीनबन्धु दया कीन्हीं निरुपाधि न्यारिये । रावरो भरोसो तुलसी के, रावरोई बल, आस रावरीयै दास रावरो विचारिये ॥ बड़ो बिकराल कलि काको न बिहाल कियो, माथे पगु बलि को निहारि सो निबारिये । केसरी किसोर रनरोर बरजोर बीर, बाँह पीर राहु मातु ज्यौं पछारि मारिये ॥२१॥
उथपे थपनथिर थपे उथपनहार, केसरी कुमार बल आपनो संबारिये । राम के गुलामनि को काम तरु रामदूत, मोसे दीन दूबरे को तकिया तिहारिये ॥ साहेब समर्थ तो सों तुलसी के माथे पर, सोऊ अपराध बिनु बीर, बाँधि मारिये । पोखरी बिसाल बाँहु, बलि, बारिचर पीर, मकरी ज्यों पकरि के बदन बिदारिये ॥२२॥
राम को सनेह, राम साहस लखन सिय, राम की भगति, सोच संकट निवारिये । मुद मरकट रोग बारिनिधि हेरि हारे, जीव जामवंत को भरोसो तेरो भारिये ॥ कूदिये कृपाल तुलसी सुप्रेम पब्बयतें, सुथल सुबेल भालू बैठि कै विचारिये । महाबीर बाँकुरे बराकी बाँह पीर क्यों न, लंकिनी ज्यों लात घात ही मरोरि मारिये ॥२३॥
लोक परलोकहुँ तिलोक न विलोकियत, तोसे समरथ चष चारिहूँ निहारिये । कर्म, काल, लोकपाल, अग जग जीवजाल, नाथ हाथ सब निज महिमा बिचारिये ॥ खास दास रावरो, निवास तेरो तासु उर, तुलसी सो, देव दुखी देखिअत भारिये । बात तरुमूल बाँहूसूल कपिकच्छु बेलि, उपजी सकेलि कपि केलि ही उखारिये ॥२४॥
करम कराल कंस भूमिपाल के भरोसे, बकी बक भगिनी काहू तें कहा डरैगी । बड़ी बिकराल बाल घातिनी न जात कहि, बाँहू बल बालक छबीले छोटे छरैगी ॥ आई है बनाई बेष आप ही बिचारि देख, पाप जाय सब को गुनी के पाले परैगी । पूतना पिसाचिनी ज्यौं कपि कान्ह तुलसी की, बाँह पीर महाबीर तेरे मारे मरैगी ॥२५॥
भाल की कि काल की कि रोष की त्रिदोष की है, बेदन बिषम पाप ताप छल छाँह की । करमन कूट की कि जन्त्र मन्त्र बूट की, पराहि जाहि पापिनी मलीन मन माँह की ॥ पैहहि सजाय, नत कहत बजाय तोहि, बाबरी न होहि बानि जानि कपि नाँह की । आन हनुमान की दुहाई बलवान की, सपथ महाबीर की जो रहै पीर बाँह की ॥२६॥
सिंहिका सँहारि बल सुरसा सुधारि छल, लंकिनी पछारि मारि बाटिका उजारी है । लंक परजारि मकरी बिदारि बार बार, जातुधान धारि धूरि धानी करि डारी है ॥ तोरि जमकातरि मंदोदरी कठोरि आनी, रावन की रानी मेघनाद महतारी है । भीर बाँह पीर की निपट राखी महाबीर, कौन के सकोच तुलसी के सोच भारी है ॥२७॥
तेरो बालि केलि बीर सुनि सहमत धीर, भूलत सरीर सुधि सक्र रवि राहु की । तेरी बाँह बसत बिसोक लोक पाल सब, तेरो नाम लेत रहैं आरति न काहु की ॥ साम दाम भेद विधि बेदहू लबेद सिधि, हाथ कपिनाथ ही के चोटी चोर साहु की । आलस अनख परिहास कै सिखावन है, एते दिन रही पीर तुलसी के बाहु की ॥२८॥
टूकनि को घर घर डोलत कँगाल बोलि, बाल ज्यों कृपाल नत पाल पालि पोसो है । कीन्ही है सँभार सार अँजनी कुमार बीर, आपनो बिसारि हैं न मेरेहू भरोसो है ॥ इतनो परेखो सब भान्ति समरथ आजु, कपिराज सांची कहौं को तिलोक तोसो है । सासति सहत दास कीजे पेखि परिहास, चीरी को मरन खेल बालकनि कोसो है ॥२९॥
आपने ही पाप तें त्रिपात तें कि साप तें, बढ़ी है बाँह बेदन कही न सहि जाति है । औषध अनेक जन्त्र मन्त्र टोटकादि किये, बादि भये देवता मनाये अधीकाति है ॥ करतार, भरतार, हरतार, कर्म काल, को है जगजाल जो न मानत इताति है । चेरो तेरो तुलसी तू मेरो कह्यो राम दूत, ढील तेरी बीर मोहि पीर तें पिराति है ॥३०॥
दूत राम राय को, सपूत पूत वाय को, समत्व हाथ पाय को सहाय असहाय को । बाँकी बिरदावली बिदित बेद गाइयत, रावन सो भट भयो मुठिका के धाय को ॥ एते बडे साहेब समर्थ को निवाजो आज, सीदत सुसेवक बचन मन काय को । थोरी बाँह पीर की बड़ी गलानि तुलसी को, कौन पाप कोप, लोप प्रकट प्रभाय को ॥३१॥
देवी देव दनुज मनुज मुनि सिद्ध नाग, छोटे बड़े जीव जेते चेतन अचेत हैं । पूतना पिसाची जातुधानी जातुधान बाग, राम दूत की रजाई माथे मानि लेत हैं ॥ घोर जन्त्र मन्त्र कूट कपट कुरोग जोग, हनुमान आन सुनि छाड़त निकेत हैं । क्रोध कीजे कर्म को प्रबोध कीजे तुलसी को, सोध कीजे तिनको जो दोष दुख देत हैं ॥३२॥
तेरे बल बानर जिताये रन रावन सों, तेरे घाले जातुधान भये घर घर के । तेरे बल राम राज किये सब सुर काज, सकल समाज साज साजे रघुबर के ॥ तेरो गुनगान सुनि गीरबान पुलकत, सजल बिलोचन बिरंचि हरिहर के । तुलसी के माथे पर हाथ फेरो कीस नाथ, देखिये न दास दुखी तोसो कनिगर के ॥३३॥
पालो तेरे टूक को परेहू चूक मूकिये न, कूर कौड़ी दूको हौं आपनी ओर हेरिये । भोरानाथ भोरे ही सरोष होत थोरे दोष, पोषि तोषि थापि आपनो न अव डेरिये ॥ अँबु तू हौं अँबु चूर, अँबु तू हौं डिंभ सो न, बूझिये बिलंब अवलंब मेरे तेरिये । बालक बिकल जानि पाहि प्रेम पहिचानि, तुलसी की बाँह पर लामी लूम फेरिये ॥३४॥
घेरि लियो रोगनि, कुजोगनि, कुलोगनि ज्यौं, बासर जलद घन घटा धुकि धाई है । बरसत बारि पीर जारिये जवासे जस, रोष बिनु दोष धूम मूल मलिनाई है ॥ करुनानिधान हनुमान महा बलवान, हेरि हँसि हाँकि फूंकि फौंजै ते उड़ाई है । खाये हुतो तुलसी कुरोग राढ़ राकसनि, केसरी किसोर राखे बीर बरिआई है ॥३५॥
सवैया राम गुलाम तु ही हनुमान गोसाँई सुसाँई सदा अनुकूलो । पाल्यो हौं बाल ज्यों आखर दू पितु मातु सों मंगल मोद समूलो ॥ बाँह की बेदन बाँह पगार पुकारत आरत आनँद भूलो । श्री रघुबीर निवारिये पीर रहौं दरबार परो लटि लूलो ॥३६॥
घनाक्षरी काल की करालता करम कठिनाई कीधौ, पाप के प्रभाव की सुभाय बाय बावरे । बेदन कुभाँति सो सही न जाति राति दिन, सोई बाँह गही जो गही समीर डाबरे ॥ लायो तरु तुलसी तिहारो सो निहारि बारि, सींचिये मलीन भो तयो है तिहुँ तावरे । भूतनि की आपनी पराये की कृपा निधान, जानियत सबही की रीति राम रावरे ॥३७॥
पाँय पीर पेट पीर बाँह पीर मुंह पीर, जर जर सकल पीर मई है । देव भूत पितर करम खल काल ग्रह, मोहि पर दवरि दमानक सी दई है ॥ हौं तो बिनु मोल के बिकानो बलि बारे हीतें, ओट राम नाम की ललाट लिखि लई है । कुँभज के किंकर बिकल बूढ़े गोखुरनि, हाय राम राय ऐसी हाल कहूँ भई है ॥३८॥
बाहुक सुबाहु नीच लीचर मरीच मिलि, मुँह पीर केतुजा कुरोग जातुधान है । राम नाम जप जाग कियो चहों सानुराग, काल कैसे दूत भूत कहा मेरे मान है ॥ सुमिरे सहाय राम लखन आखर दौऊ, जिनके समूह साके जागत जहान है । तुलसी सँभारि ताडका सँहारि भारि भट, बेधे बरगद से बनाई बानवान है ॥३९॥
बालपने सूधे मन राम सनमुख भयो, राम नाम लेत माँगि खात टूक टाक हौं । परयो लोक रीति में पुनीत प्रीति राम राय, मोह बस बैठो तोरि तरकि तराक हौं ॥ खोटे खोटे आचरन आचरत अपनायो, अंजनी कुमार सोध्यो रामपानि पाक हौं । तुलसी गुसाँई भयो भोंडे दिन भूल गयो, ताको फल पावत निदान परिपाक हौं ॥४०॥
असन बसन हीन बिषम बिषाद लीन, देखि दीन दूबरो करै न हाय हाय को । तुलसी अनाथ सो सनाथ रघुनाथ कियो, दियो फल सील सिंधु आपने सुभाय को ॥ नीच यहि बीच पति पाइ भरु हाईगो, बिहाइ प्रभु भजन बचन मन काय को । ता तें तनु पेषियत घोर बरतोर मिस, फूटि फूटि निकसत लोन राम राय को ॥४१॥
जीओ जग जानकी जीवन को कहाइ जन, मरिबे को बारानसी बारि सुर सरि को । तुलसी के दोहूँ हाथ मोदक हैं ऐसे ठाँऊ, जाके जिये मुये सोच करिहैं न लरि को ॥ मो को झूँटो साँचो लोग राम कौ कहत सब, मेरे मन मान है न हर को न हरि को । भारी पीर दुसह सरीर तें बिहाल होत, सोऊ रघुबीर बिनु सकै दूर करि को ॥४२॥
सीतापति साहेब सहाय हनुमान नित, हित उपदेश को महेस मानो गुरु कै । मानस बचन काय सरन तिहारे पाँय, तुम्हरे भरोसे सुर मैं न जाने सुर कै ॥ ब्याधि भूत जनित उपाधि काहु खल की, समाधि की जै तुलसी को जानि जन फुर कै । कपिनाथ रघुनाथ भोलानाथ भूतनाथ, रोग सिंधु क्यों न डारियत गाय खुर कै ॥४३॥
कहों हनुमान सों सुजान राम राय सों, कृपानिधान संकर सों सावधान सुनिये । हरष विषाद राग रोष गुन दोष मई, बिरची बिरञ्ची सब देखियत दुनिये ॥ माया जीव काल के करम के सुभाय के, करैया राम बेद कहें साँची मन गुनिये । तुम्ह तें कहा न होय हा हा सो बुझैये मोहिं, हौं हूँ रहों मौनही वयो सो जानि लुनिये ॥४४॥
Shri Hanuman Bahuk in English
Sindhu-taran, Siya-soch-haran, Rabi-baalbaran-tanu |
Bhuj bisaal, moorti karaal, kaalhuko kaal janu ||
Gahan-dahan-nirdahan-lank nihsank, bank-bhuv |
Jaatudhaan-balvaan-maan-mad-davan pavansuv ||
Kah Tulsidas sevat sulabh, sevak hit santat nikat |
Gunganat, namat, sumirat, japat, saman sakal-sankat-bikat || 1 ||
Svaran-saail-sankas koti-rabi-tarun-tej-ghan |
Ur bisaal, bhujdandh chand nakh bajra bajratan ||
Ping nayan, bhrikutee karaal rasnaa dasnaanan |
Kapis kes, karkas langoor, khal-dal bal bhaanan ||
Kah Tulsidas bas jaasu ur maarutsut moorti bikat |
Santaap paap tehi purush panhi sapnehun nahin aavat nikat || 2 ||
Panchmukh-chamukh-bhrigumukhya bhat-asur-sur,
Sarv-sari-samar samratth sooro |
Bankuro beer birudaait birudaavlee,
Baid bandee badat paaijpooro ||
Jaasu gungaath Raghunaath kah, jasu bal,
Bipul-jal-bharit jag-jaldhi jhooro |
Duvan-dal-damanko kaun Tulsees hai
Pavanko poot Rajpoot rooro || 3 ||
Bhanuson parrhan hanuman gaye bhanu man-
anumaani sisukeli kiyo pherphaar so |
Paachhile pagni gam gagan magan-man,
Kramko na bhram, kapi baalak-bihaar so ||
Kautuk biloki lokpaal hari har bidhi
Lochanani chakaachaundhee chitni khabhaar so |
Bal kaaidhaun beerras, dheeraj kai, sahas kai,
Tulsi sareer dhare sabniko saar so || 4 ||
Bharatmein paarthke rathketu kapiraaj,
Gaajyo suni kururaaj dal halbal bho |
Kahayo Dron Bheesham sumeersut Mahaabeer,
Beer-ras-baari-nidhi jaako bal jal bho ||
Baanar subhaay baalkeli bhoomi bhaanu laagi,
Phalang phalaanghoonten ghaati nabhtal bho |
Naai-naai maath jori-jori haath jodha johain,
Hanuman dekhe jagjeevanko phal bho || 5 ||
Gopad payodhi kari holika jyon layee lank,
Nipat nisank parpur galbal bho |
Dron-so pahaar liyo khyaal hee ukhari kar,
Kanduk-jyon kapikhel bel kaaiso phal bho ||
Sankatsamaaj asmanjas bho Ramraaj
Kaaj jug-poogniko kartal pal bho |
Saahsee samatth Tulsiko naah jaaki baanh,
Lokpaal paalanko phir thir thal bho || 6 ||
Kamathkee peethi jaake gorhnikee gaarhain maano
Naapke bhaajan bhari jalnidhi-jal bho |
Jaatudhaan-daavan paraavanko durge bhayo,
Mahaameenbaas timi tomaniko thal bho ||
Kumbhkaran-Ravan-payodnaad-eedhanko
Tulsi prataap jaako prabal anal bho |
Bheesham kahat mere anumaan Hanuman-
Saarikho trikaal na trilok mahaabal bho || 7 ||
Doot Ramrayko, sapoot poot paunko, too
Anjaneeko nandan prataap bhoori bhaanu so |
Seey-soch-saman, durit-dosh-daman,
Saran aaye avan, lakhanpriya praan so ||
Dasmukh dusah daridra daribeko bhayo,
Pratak tilok aok Tulsi nidhaan so |
Gyan-gunvaan balvaan sevaa saavdhaan,
Saaheb sujaan ur aanu Hanuman so || 8 ||
Davan-duvan-dal bhuvan-bidit bal,
Baid jas gaavat bibudh bandeechor ko |
Paap-taap-timir tuhin-vightan-patu,
Sevak-saroruh sukhad bhaanu bhorko ||
Lok-parlokten bisok sapne na sok,
Tulsike hiye hai bharoso ek aorko |
Ramko dulaaro daas baamdevko nivaas,
Naam kali-kaamtaru kesri-kisorko || 9 ||
Mahaabal-seem,mahaabheem,mahaabaanit,
Mahabeer bidit barayo Raghubeerko |
Kulis-kathortanu jorparai ror ran,
Karuna-kalit man dhaarmik dheerko ||
Durjanko kaalso karaal paal sajjanko,
Sumire haranhaar Tulsiki peerko |
Seey-sukhdaayak dulaaro Raghunaayak ko,
Sevak sahaayak hai saahsee sameerko || 10 ||
Rachibeko bidhi jaise, paalibeko hari, har
Meech maaribeko, jyaibeko sudhaapaan bho |
Dharibeko dharni, tarni tam dalibeko,
Sokhibe krisaanu, poshibeko him-bhaanu bho ||
Khal-dukh-doshibeko, jan-paritoshibeko,
Maangibo maleentaako modak sudaan bho |
Aaratkee aarti nivaaribeko tihoon pur,
Tulsiko saheb hatheelo Hanuman bho || 11 ||
Sevak syokaee jaani jaankees maanai kaani,
Saanukool soolpaani navaai naath naankko |
Devi dev daanav dayaavane havaai joraain haath,
Baapure baraak kahaa aur raja raankko ||
Jaagat sovat baithe baagat binod mod,
taakai jo anarth so samarth ek aankko |
sab din rooro paraai pooro jahan-tahan taahi,
jaake hai bharoso hiye hanuman haankko || 12 ||
Saanug sagauri saanukool soolpani taahi,
Lokpaal sakal lakhan ram janki |
Lok parlokko bisok so tilok taahi,
Tulsi tamai kahaa kaahu beer aankee ||
Kesrikisor bandeechorke nevaaje sab,
Keerti bimal kapi karunanidhaankee |
Balak-jyon paalihain kripaalu muni siddh taako,
jaake hiye hulsati haank hanumanki || 13 ||
Karuna nidhaan, balbudhike nidhaan, mod-
mahimanidhaan, gun-gyaanke nidhaan hau |
Baamdev-roop, bhoop Ramke sanehee, naam
lait-dait arth dharm kaam nirbaan hau ||
Aapne prabhav, Sitanathke subhaav seel,
Lok-baid-bidhike bidush Hanuman hau |
Mankee, bachankee, karamkee tihoon prakar,
Tulsi tihaaro tum saheb sujaan hau || 14 ||
Manko agam, tan sugam kiye kapees,
Kaaj mahaaraajke samaaj saaj saaje hain |
Dev-bandeechor ranror Kesreekisor,
Jug-jug jag tere birad biraaje hain ||
Beer barjor, ghati jor Tulsiki aur
Suni sakuchaane saadhu, khalgan gaaje hain |
Bigree sanvaar Anjanikumar keeje mohin,
Jaise hot aaye Hanumanke nivaaje hain | 15 ||
Jaansiromani hau Hanuman sadaa janke man baas tihaaro |
Dhaaro bigaaro main kaako kahaa kehi kaaran kheejhat haun to tihaaro ||
Saaheb sevak naate te haato kiyo so tahaan Tulsiko na chaaro |
Dosh sunaaye tain aagehunko hoshiyaar havai hon man tau hiye haaro ||16||
Tere thape uthapaai na mahes, thapaai thirko kapi je ghar ghaale |
Tere nivaaje gareebnivaaj biraajat baairinke ur saale |
Sankat soch sabaai Tulsi liye naam phataai makreeke-se jaale |
Boorh bhaye, bali, merihi baar, ki haari pare bahutaai natt paale || 17 ||
Sindhu tare, barhe beer dale khal, jaare hain lankse bank mavaa se |
Taain ran-kehri kehrike bidle ari-kunjar chaail chavaa se ||
Toson samath susaaheb sei sahaai Tulsi dukh dosh davaase |
Baanar baaj barhe khal-khechar, leejat kyon na lapeti lavaa-se || 18 ||
Achh-vimardan kaanan-bhaani dasaanan aanan bhaan nihaaro |
Baaridnaad ankpan kumbhkaran-se kunjar kehri-baaro ||
Ram-prataap-hutaasan, kachh,bipachh, sameer sameerdulaaro |
Paapten, saapten, taap tihoonte sadaa Tulsi kahan so rakhvaaro || 19 ||
Jaanat jahaan Hanumanko nivaajyau jan,
Man anumaani, bali, bol na bisaariye |
Sevaa-jog Tulsi kabhoon kahaa chook paree,
Saheb subhaav kapi saahibee sanbhaariye ||
Apraadhee jaani keejaai saasti sahas bhaanti,
Modak maraai jo, taahi maahur na maariye |
Saahsee sameerke dulaare Raghubeerjooke,
Baanh peer Mahaabeer begi hee nivaariye || 20 ||
Baalak biloki, bali baareten aapno kiyo |
Deenbandhu dayaa keenheen nirupaadhi nyaariye |
Raavro bharoso Tulsike, Raavroee bal,
Aas raavreeyaai, daas raavro bichaariye ||
Barho bikraal kali, kaako na bihaal kiyo,
Maathe pagu baleeko, nihaari so nivaariye |
Kesreekisor, ranror, barjor beer,
Bahunpeer raahumaatu jyaun pachaari maariye || 21 ||
Uthape thapanthir thape uthpanhaar,
Kesreekumar bal aapno sambhariye |
Ramke gulaamniko kaamtaru Ramdoot,
Mose deen doobareko takiyaa tihaariye ||
Saheb samarth toson Tulsike maathe par,
Sou apraadh binu beer, baandhi maariye |
Pokhree bisaal banhu, bali baarichar peer,
Makree jyaun pakrikaai badan bidaariye || 22||
Ramko saneh, Ram saahas lakhan siya,
Ramkee bhagti, soch sankat nivaariye |
Mud-markat rog-baarinidhi heri haare,
Jeev-jaamvantko bharoso tero bhaariye ||
Koodiye kripaal Tulsi suprem-pabbyaten,
Suthal subel bhaalu baaithikaai bichaariye |
Mahabeer bankure baraakee banhpeer kyon na,
Lankinee jyon laatghaat hee marori maariye || 23 ||
Lok-parlokhoon tilok na bilokiyat,
Tose samrath chash chaarihoon nihaariye |
Karm, kaal, lokpaal, ag-jag jeevjaal,
Naath haath sab nij mahimaa bichaariye ||
Khaas daas raavro, nivaas tero taasu ur,
Tulsi so dev dukhee dekhiyat bhaariye |
Baat tarumool banhusool kapikachhu-beli,
Upjee sakeli kapikeli hee ukhaariye || 24 ||
Karam-karaal-kans Bhoomipaalke bharose,
Bakee bakbhaginee kaahooten kahaa daraaigee|
Barhee bikraal baalghaatinee na jaat kahi,
Baanhubal baalak chabeele chote charaaigee||
Aaee haai banaae besh aap hee bichaari dekh,
Paap jaaya sabko guneeke paale paraaigee|
Pootna pisaachinee jyaaun kapikaanh Tulsikee,
Baanhpeer mahaabeer, tere maare maraaigee|| 25 ||
Bhaalkee ki kaalkee ki roshkee tridoshkee hai,
Bedan bisham paap-taap chalchaanhkee |
Karman kootkee ki jantramantra bootkee,
Paraahi jaahi paapinee maleen manmaanhkee ||
Paaihhi sajaay nat kahat bajaay tohi,
Baavree na hohi baani jaani kapinaanhkee |
Aan Hanumaankee dohaaee balvaankee,
Sapath Mahaabeerkee jo rahaai peer baanhkee || 26 ||
Sinhika sanhaari bal, sursaa sudhaari chhal,
Lankinee pachhaari maari baatika ujaaree hai |
Lank parjaari makree bidaari baarbaar,
Jaatudhaan dhaari dhooridhaanee kari daaree haai ||
Tori jamkaatari Madodri karhori aanee,
Ravankee raanee Meghnad Manhtaaree haai ||
Bheer baanhpeerkee nipat raakhee Mahaabeer,
Kaaunke sakoch Tulsike soch bhaaree haai || 27 ||
Tero baalkeli beer suni sahmat dheer,
Bhoolat sareersudhi sakra-rabi-rahukee ||
Teree baanh basat bisok lokpaal sab,
Tero naam lait rahaai aarti na kaahukee ||
Saam daan bhed bidhi baidhoo labed sidhi,
Haath kapinathheeke chotee chor saahukee|
Aalas anakh parihaaskaai sikhaavan haai,
Aite din rahee peer Tulsike baahukee || 28 ||
Tookniko ghar-ghar dolat kangaal boli,
Baal jyon kripaal natpaal paali poso haai |
Keenhee haai sanbhaar saar Anjaneekumar beer,
Aapno bisaarihaain na merehoo bharoso haai ||
Itno parekho sab bhaanti samrath aaju,
Kapiraaj saanchee kahaaun ko Tilok toso haai |
Saasti sahat daas keeje pekhi parihaas,
Cheereeko maran khel baalkaniko so haai || 29 ||
Aapne hee paaptein tritaapatein ki saaptein,
Barree haai baanhbedan kahee na sahi jaati haai |
Aaushadh anek jantra-mantra-totkaadi kiye,
Baadi bhaye devtaa manaaye adhikaati haai ||
Kartaar, bhartaar, hartaar, karm, kaal,
Ko haai jagjaal jo na maanat itaati haai |
Chero tero Tulsee too mero kahyo Ramdoot,
Dheel teree beer mohi peertein piraati haai || 30 ||
Doot Ramrayako, sapoot poot baayko,
Samathh haath paayko sahaay asahaayko |
Baankee biradaavlee bidit baid gaiyat,
Raavan so bhat bhayo muthikaake ghaayako ||
Aite barhe saaheb samarthko nivaajo aaj,
Seedat susevak bachan man kaayako |
Thoree baanhpeerkee barhi galaani Tulsiko,
Kaun paap kop, lop pragat prabhaayako || 31 ||
Devee dev danuj manuj muni siddh naag,
Chote barhe jeev jete chetan achet haain |
Pootna pisaachee jaatudhaanee jaatudhaan baam,
Ramdootkee rajaai maathe maani lait haain ||
Ghor jantra mantra koot kapat kurog jog,
Hanoomaan aan suni chaarhat niket haain |
Krodh keeje karmko prabodh keeje Tulseeko,
Sodh keeje tinko jo dosh dukh dait haain || 32 ||
Tere bal baanar jitaaye ran Raavanson,
Tere ghaale jaatudhaan bhaye ghar-gharke |
Tere bal Raamraj kiye sab surkaaj,
Sakal samaaj saaj saaje Raghubarke ||
Tero gungaan suni geerbaan pulkat,
Sajal bilochan biranchi Hari harke |
Tulsike maathepar haath phero keesnaath,
Dekhiye na daas dukhee tose kanigarke || 33 ||
Paalo tere tookko parehoo chook mookiye na,
Koor kaaurhee dooko haaun aapnee aur heriye |
Bhoraanaath bhorehee sarosh hot thore dosh,
Poshi toshi thaapi aapno na avderiye ||
Anbu too haaun Ambuchar, amb too haaun dimbh, so na,
Boojhiye bilamb avlamb mere teriye |
Baalak bikal jaani paahi prem pahichaani,
Tulseekee baanh par laameeloom pheriye || 34 ||
Gheri liyo rogni kujogni kulogni jyaaun,
Baasar jalad ghan ghata dhuki dhaaee haai |
Barsat baari peer jaariye javaase jas,
Rosh binu dosh, dhoom-mool malinaaee haai ||
Karnunaanidhaan Hanumaan mahaabalvaan,
Heri hansi haanki phoonki phaaujen taain udhaaee haai |
Khaaye huto Tulsee kurog raadh raaksani,
Kesreekisor raakhe beer bariaaee haai || 35 ||
Raamgulaam tuhee Hanuman
Gosaain susaain sadaa anukoolo |
Paalyo haaun baal jyon aakhar doo
Pitu maatu son mangal mod samoolo ||
Baanhkee bedan baanhpagaar
Pukaarat aarat aanand bhoolo |
ShriRaghubeer nivaariye peer
Rahaaun darbaar paro lati loolo || 36 ||
Kaalkee karaaltaa karam kathinaaee keedhaaun,
Paapke prabhaavkee subhaaya baaya baavre |
Bedan kubhaanti so sahee na jaati raati din,
Soee baanh gahee jo gahee sameerdaavre ||
Laayo taru Tulsee tihaaro so nihaari baari,
Seenchiye maleen bho tayo haai tihoon taavre |
Bhootanikee aapnee paraayekee kripanidhaan,
Jaaniyat sabheekee reeti Ram Raavre|| 37 ||
Paayanpeer petpeer baanhpeer munhpeer,
Jarjar sakal sareer peermaee haai |
Dev bhoot pitar karam khal kaal grah,
Mohipar davri damaanak see daee haai ||
Haaun to bin molke bikaano bali baarehee tain,
Aot Ramnaamkee lalaat likhi laee haai |
Kumbhajke kinkar bikal boodhe gookhurani,
Haay Ramraay aisee haal kahoon bhaee haai || 38 ||
Baahuk-subaahu neech leechar-mareech mili,
Munhpeer-ketujaa kurog jaatudhaan haain|
Ram naam japjaag kiyo chahon saanuraag,
Kaal kaise doot bhoot kahaa mere maan haain ||
Sumire sahaaya RamLakhan aakhar douu,
Jinke samooh saake jaagat jahaan haain|
Tulsee sanbhaari Tadhka-sanhaari bhaaree bhat,
Bedhe bargadse banai baanvaan haain || 39 ||
Baalpane soodhe man Ram sanmukh bhayo,
Ramnaam leit maangi khaat tooktaak haaun |
Paryo lokreetimein puneet preeti Ramraaya,
Mohbas baaitho tori tarkitraak haaun ||
Khote-khote aachran aachrat apnaayo,
Anjanikumar sodhyo Rampaani paak haaun
Tulsee gosaaen bhayo bhonrhe din bhooli gayo,
Taako phal paavat nidaan paripaak haaun || 40 ||
Asan-basan-heen visham-vishaad-leen,
Dekhi deen doobro karaai na haay-haay ko |
Tulsee anaathso sanaath Raghunaath kiyo,
Diyo phal seelsindhu aapne subhaayko ||
Neech yahi beech pati paai bharuhaaigo,
Bihaai prabhu-bhajan bachan man kaayko |
Taaten tanu peshiyat ghor bartor mis,
Phooti-phooti niksat lon Raamraayko || 41 ||
Jiaon jag jaankeejeevanko kahaai jan,
Maribeko baaraansee baari sursariko |
Tulseeke duhoon haath modak haai aise thaun,
Jaake jiye muye soch karihaain na lariko |
Moko jhootho saancho log Ramko kahat sab,
Mere man maan haai na harko na hariko ||
Bhaaree peer dusah sareertain bihaal hot,
Souu Raghubeer binu sakaai door kariko || 42 ||
Sitapati saaheb sahaay Hanuman nit,
Hit updesko mahes maano gurukaai,
Maanas bachan kaay saran tihaare paany
Tumhare bharose sur maain na jaane surkaai ||
Byaadhi bhootjanit upaadhi kaahoo khalkee,
Samaadhi keeje Tulseeko jaani jan phurkaai |
Kapinaath Raghunaath bholaanaath Bhootnaath,
Rogsindhu kyon na daariyat gaay khurkaai || 43 ||
Kahon Hanumanson sujaan Raamraayson,
Kripanidhaan sankarson saavdhaan suniye |
Harash vishaad raag rosh gun doshmaee,
Birchee biranchi sab dekhiyat duniye |
Maya jeev kaalke karamke subhaayke,
Karaaiya Raam baid kahaain saanchee man guniye |
Tumhaten kahaa na hoy haahaa so bujhaaiye mohi,
Haaun hoon rahon maaun hee bayo so jaani luniye || 44 ||
